Reuters: სამხრეთ კორეა უკრაინისგან ჩრდილოკორეელი სამხედრო ტყვეების გადაცემის გასაჯაროებისთვის ბოდიშის მოხდას მოითხოვს

სამხრეთ კორეის პრეზიდენტის ადმინისტრაციამ უკრაინისგან ოფიციალური განმარტება და ბოდიში მოითხოვა და კიევი ორი ჩრდილოკორეელი სამხედრო ტყვის სამხრეთ კორეაში გადაცემის შესახებ ინფორმაციის გასაჯაროებაში დაადანაშაულა. ინფორმაციას Reuters-ი ავრცელებს.

სააგენტოს ცნობით, სეულში ასევე აცხადებენ, რომ უკრაინამ მოგვიანებით ცრუ ინფორმაცია გაავრცელა, თითქოს მხარეებს საკითხის კონფიდენციალურად დატოვებაზე შეთანხმება არ ჰქონიათ.

„პრეზიდენტის ადმინისტრაცია ღრმა მწუხარებას გამოთქვამს უკრაინის მიერ ინფორმაციის ცალმხრივად გასაჯაროებისა და შემდგომ გავრცელებული ცრუ განცხადების გამო, თითქოს მხარეებს ინფორმაციის გაუთქმელობაზე შეთანხმება არ ჰქონიათ“, - განაცხადა პრეზიდენტის ადმინისტრაციის საზოგადოებასთან ურთიერთობის საკითხებში უფროსმა მდივანმა სონგ გი ჰონგმა.

მისი თქმით, საჭიროების შემთხვევაში, მთავრობა საკითხთან დაკავშირებით დამატებითი ზომების მიღებასაც განიხილავს.

სონგის განცხადებით, უკრაინა სეულთან სხვადასხვა არხის მეშვეობით არაერთხელ განიხილავდა სამხედრო ტყვეების გადაცემის საკითხს და კონფიდენციალურობის დაცვას ითხოვდა. უკრაინის ხელისუფლების არგუმენტი იყო, რომ ინფორმაციის გასაჯაროებას შესაძლოა უკრაინაში კრიტიკა მოჰყოლოდა იმის გამო, რომ კიევმა სამხედროების უკრაინელ ტყვეებზე გაცვლის შესაძლებლობა დათმო.

მისივე თქმით, სამხრეთ კორეა უსაფრთხოების, დიპლომატიური და ჰუმანიტარული მოსაზრებების, მათ შორის სამხედრო ტყვეებისა და მათი ოჯახების უსაფრთხოების გათვალისწინებით, ინფორმაციის კონფიდენციალურად შენარჩუნებას დათანხმდა.

განცხადების თანახმად, უკრაინის პრეზიდენტმა ვოლოდიმირ ზელენსკიმ სამხედრო ტყვეების გადაცემის შესახებ საკმარისი წინასწარი კონსულტაციების გარეშე გაეროს გენერალური ასამბლეისადმი მიმართვაში გაავრცელა ინფორმაცია, შემდეგ კი კონფიდენციალურობის შესახებ შეთანხმების არსებობა უარყო.

სონგის განცხადებით, უკრაინის მხრიდან შეთანხმების არსებობის უარყოფამ ორ მთავრობას შორის ნდობა სერიოზულად დააზიანა და შესაძლოა ორმხრივ ურთიერთობებზეც უარყოფითად აისახოს.

Reuters-ის ინფორმაციით, ზელენსკიმ გასულ კვირას გაეროს გენერალური ასამბლეის სხდომაზე განაცხადა, რომ უკრაინამ ორი დატყვევებული ჩრდილოკორეელი სამხედრო სამხრეთ კორეას გადასცა.

რამდენიმე დღის შემდეგ სამხრეთ კორეის პრეზიდენტმა ლი ჩჟე მენმა განაცხადა, რომ უკრაინამ ინფორმაციის გაუთქმელობის შესახებ შეთანხმება დაარღვია და სამხედრო ტყვეების გადაცემის ფაქტი გაასაჯაროვა.

სოციალურ ქსელ X-ში სამხრეთ კორეის პრეზიდენტმა დაწერა, რომ არსებული შესაძლო შედეგების გათვალისწინებით, „ყველა თვალსაზრისით სწორი იყო“ გადაცემის შესახებ ინფორმაციის არ გასაჯაროება და რომ მხარეები მის კონფიდენციალურად შენარჩუნებაზე შეთანხმდნენ.

„არ ვიცი, რა გარემოებებმა განაპირობა უკრაინული მხარის მიერ ამ საკითხის გასაჯაროება კონფიდენციალურობის შესახებ შეთანხმების მიუხედავად, თუმცა ეს ღრმად სამწუხაროა“, - დაწერა მან.

უკრაინამ ორი ჩრდილოკორეელი სამხედრო 2025 წლის იანვარში რუსეთის კურსკის ოლქში დაატყვევა. ისინი პირველი ჩრდილოკორეელი სამხედროები იყვნენ, რომლებიც ცოცხლად დაატყვევეს მას შემდეგ, რაც ფხენიანი 2024 წელს რუსეთის დასახმარებლად ომში ჩაერთო.

სამხრეთ კორეა მანამდე უარს ამბობდა სამხედროების ქვეყანაში ჩასვლის დადასტურებაზე და ამის მიზეზად თავად სამხედროებისა და ჩრდილოეთ კორეაში დარჩენილი მათი ოჯახის წევრების უსაფრთხოებას ასახელებდა, წერს Reuters-ი.