ირაკლი ფურცელაძე აშშ-ის ვოლტერ რიდის არმიის კვლევითი ინსტიტუტის პოლკოვნიკ ბრაიანა პერატასა და მთავარ სერჟანტ მონეტ ბუშნერს შეხვდა

დაავადებათა კონტროლისა და საზოგადოებრივი ჯანმრთელობის ეროვნული ცენტრის გენერალური დირექტორი, ირაკლი ფურცელაძე, აშშ-ის ვოლტერ რიდის არმიის კვლევითი ინსტიტუტის (WRAIR) მეთაურს, პოლკოვნიკ ბრაიანა პერატასა და მთავარ სერჟანტ მონეტ ბუშნერს შეხვდა. ინფორმაციას დაავადებათა კონტროლისა და საზოგადოებრივი ჯანმრთელობის ეროვნული ცენტრი ავრცელებს.

შეხვედრაზე ხაზი გაესვა ორ ორგანიზაციას შორის არსებულ მჭიდრო პარტნიორობას, რომელმაც მნიშვნელოვანი წვლილი შეიტანა ინსტიტუციური, სამეცნიერო და ლაბორატორიული შესაძლებლობების გაძლიერებაში.

მხარეებმა სამომავლო თანამშრომლობის პერსპექტივებზე იმსჯელეს. განსაკუთრებით აღინიშნა WRAIR-ის როლი რიჩარდ ლუგარის საზოგადოებრივი ჯანმრთელობის კვლევითი ცენტრის მდგრადი ფუნქციონირების, სამეცნიერო, ადმინისტრაციული და ინფრასტრუქტურული მიმართულებების განვითარებაში.

შეხვედრას დაავადებათა კონტროლის ცენტრის გენერალური დირექტორის მოადგილეები ეკა ადამია, ირმა ხონელიძე, WRAIR-ის ევროპისა და ახლო აღმოსავლეთის მიმართულების დირექტორი პოლკოვნიკი ბრაიონი სოლტისი და ამავე მიმართულების სამეცნიერო დირექტორი ვიცე-პოლკოვნიკი თომას მუსიჩი ესწრებოდნენ.