გიორგი ტყემალაძე: დარწმუნებული ვარ, რომ მოკლე ვადაში გაიხსნება დიუშენის კუნთოვანი დისტროფიის მქონე ბავშვებისთვის სარეაბილიტაციო ცენტრი. ვფიქრობ ეს არის ძალიან მნიშვნელოვანი გადაწყვეტილება

დარწმუნებული ვარ, რომ მოკლე ვადაში გაიხსნება [დიუშენის კუნთოვანი დისტროფიის მქონე ბავშვებისთვის] სარეაბილიტაციო ცენტრი, - განაცხადა „დღის ქრონიკაში“ თბილისის ვიცე-მერმა გიორგი ტყემალაძემ.

მისივე თქმით, მნიშვნელოვანია, რომ ამ პროცესში მშობლები აქტიურად იყვნენ ჩართულები.

„გლდანის რაიონში იქნება სარეაბილიტაციო ცენტრი, რაც გულისხმობს როგორც სარეაბილიტაციო, ასევე საგანმანათლებლო სფეროებს, რაც მნიშვნელოვნად შეუწყობს ხელს სოციალიზაციას. ვფიქრობ ძალიან მნიშვნელოვანი გადაწყვეტილებაა. იცით, რომ ცენტრალური ხელისუფლება ძალიან მნიშვნელოვან ღონისძიებებს ატარებს ამ პაციენტების მიმართ და მშობლებთან და ასოციაციასთან კონსულტაციების შემდეგ მივიღეთ ეს გადაწყვეტილება. განხორციელდება 300 000-ზე მეტი ინვესტიცია და უახლოეს მომავალში გვექნება ეს სარეაბილიტაციო ცენტრი. ჩვენ ყოველდღიურად ვზრუნავთ, რომ ჩვენი თითოეული გადაწყვეტილება იყოს იმ ადამიანებისკენ მიმართული, რომლებიც ამას საჭიროებენ და ეს გადაწყვეტილებაც ამის დასტურია.

ეს პროცესი მიმდინარეობდა მშობლების აქტიური მონაწილეობით. მნიშვნელოვანია, რომ ისინი აქტიურად არიან ჩართულები და ერთმანეთთან თანამშრომლობით მოკლე ვადაში მივიღეთ ეს გადაწყვეტილება და დარწმუნებული ვარ, რომ ასევე მოკლე ვადაში გაიხსნება სარეაბილიტაციო ცენტრი“, - აღნიშნა გიორგი ტყემალაძემ.

დედაქალაქის მერმა კახა კალაძემ თბილისის მუნიციპალიტეტის მთავრობის სხდომაზე განაცხადა, რომ თბილისში დიუშენის კუნთოვანი დისტროფიის მქონე ბავშვებისთვის სარეაბილიტაციო ცენტრი აშენდება.