ნათია თურნავა: ევროკავშირმა აღგვითქვა დახმარება საქართველოს, ბულგარეთის, რუმინეთისა და უკრაინის პორტებს შორის შავ ზღვაზე სატრანსპორტო მიმოსვლის განვითარებაზე

ევროკავშირი არის ჩვენი ნომერ პირველი სავაჭრო პარტნიორი, მაგრამ სატრანსპორტო მიმოსვლა ჩვენს პორტებს შორის არ არის რეგულარული და არ შეესაბამება იმ დინამიკასა და ტემპს, რაც გვჭირდება. ევროკავშირმა აღგვითქვა ამაში დახმარება, მათ შორის, შესაბამისი სამოქმედო გეგმის მომზადებაში, – ამის შესახებ ეკონომიკის მინისტრმა, ნათია თურნავამ ბრიუსელში ვიზიტისას განაცხადა.

მისი თქმით, საუბარია საქართველოს, ბულგარეთის, რუმინეთისა და უკრაინის პორტებს შორის შავ ზღვაზე სატრანსპორტო მიმოსვლის განვითარებაზე.

„იყო საქმიანი მსჯელობა, დისკუსია იმაზე, თუ რამდენად მაღალ პროგრესს მიაღწია საქართველომ ასოცირების შეთანხმებისა და თავისუფალი ვაჭრობის შეთანხმების ვალდებულებების შესრულებაში. ჩვენ დავაყენეთ რამდენიმე საკითხი, რაშიც სრული მხარდაჭერა გამოგვიცხადეს. პირველ რიგში, ეს არის ფიზიკური კავშირ-ურთიერთობების განვითარება შავ ზღვაზე, რაც დაგვაკავშირებს ევროპულ სახელმწიფოებთან. კონკრეტულად ვსაუბრობთ იმაზე, რომ მეტად განვავითაროთ შავ ზღვაზე სატრანსპორტო მიმოსვლა საქართველოს, ბულგარეთს, რუმინეთსა და უკრაინის პორტებს შორის“, - განაცხადა თურნავამ.

ამასთან, ეკონომიკის მინისტრმა განმარტა, რომ ლაპარაკია საბორნე მიმოსვლის გააქტიურებაზე. „დღეს სწრაფად ვითარდება ჩვენსა და ევროკავშირს შორის ვაჭრობა. ევროკავშირი არის ნომერ პირველი ჩვენი სავაჭრო პარტნიორი, მაგრამ სატრანსპორტო მიმოსვლა ჩვენს პორტებს შორის არ არის რეგულარული და არ შეესაბამება იმ დინამიკასა და ტემპს, რაც ჩვენ გვჭირდება. ევროკავშირმა აღგვითქვა ამაში დახმარება, მათ შორის შესაბამისი სამოქმედო გეგმის მომზადებაში“, – განაცხადა თურნავამ.