იმედი გვაქვს, რომ სახალხო დამცველის წარმომადგენლები, რომლებიც დანაშაულის მოწმენი გახდნენ, პროკურატურასთან საუბარში დაასახელებენ გვარებს და სახელებს, - ამის შესახებ გადაცემაში „დღის ქრონიკა“ იუსტიციის მინისტრმა თეა წულუკიანმა განაცხადა.

ის კიდევ ერთხელ გამოეხმაურა სახალხო დამცველის, ნინო ლომჯარიას დღევანდელ მოხსენებას და აღნიშნა, რომ თუ ვინმე ზაფხულში დანაშაულს შეესწრო, ამის შესახებ მხოლოდ იანვარში არ უნდა საუბრობდეს.

„ომბუდსმენმა დღეს გაუგებარი პასუხი გასცა საზოგადოებას, თუ ზაფხულიდან რატომ ინახავდა ასეთ სერიოზულ ცნობებს ვითომ დანაშაულის შესახებ. ანგარიშის გამოქვეყნებამდე ან მასთან ერთად ომბუდსმენის აპარატს უნდა გადაეგზავნა საგამოძიებო ორგანოში შეტყობინება დანაშაულის შესახებ. ამ ინფორმაციის შენახვა კანონით დასჯადია. რა თქმა უნდა, იუსტიციის სამინისტრო ვერ მოსთხოვს სახალხო დამცველს, რომ ჩვენ გაგვანდოს ეს ინფორმაცია, მაგრამ იმედი გვაქვს, რომ სახალხო დამცველის წარმომადგენლები, რომლებიც დანაშაულის მოწმენი გახდნენ, პროკურატურასთან საუბარში დაასახელებენ გვარებს და სახელებს“, - განაცხადა წულუკიანმა.

​მისივე თქმით, სახალხო დამცველის აპარატი ვალდებული იყო, ეცნობებინა საგამოძიებო ორგანოსთვის იმ შესაძლო დანაშაულის შესახებ, რომელსაც მისი თანამშრომლები პენიტენციურ დაწესებულებაში შეესწრნენ.

„როდესაც სუბკულტურასთან ბრძოლაში ჩვენ ქმედით ნაბიჯებს ვდგამთ, ჩემთვის გაუგებარია, რა ე.წ. გარჩევას შეესწრო ე.წ. ზონაში სახალხო დამცველის წარმომადგენელი და თუ ეს ნამდვილად მოხდა და უკვე დაგვიანებული არაა, აუცილებლად უნდა დაიწყოს გამოძიება ამ დანაშაულზე. მათ დროულად უნდა მიაწოდონ გამოძიებას გვარები, სახელები, თარიღი და დაწესებულების ნომერი. როდესაც ასეთ ფაქტს ჩვენ ვაფიქსირებთ, ყოველთვის ვრეაგირებთ მყისიერად. იგივე ვალდებულება აქვს სახალხო დამცველსაც“, - აღნიშნა იუსტიციის მინისტრმა.

დღეს ადამიანის უფლებათა დაცვის კომიტეტის სხდომაზე ნინო ლომჯარიამ დეპუტატებს ომბუდსმენის სპეციალური პრევენციული ჯგუფის მიერ განხორციელებული მონიტორინგის შედეგებზე მომზადებული ანგარიში გააცნო.