გენერალური პროკურორობის კანდიდატმა ირაკლი შოთაძემ დღეს საპროკურორო საბჭოსთან განმარტა, თუ რატომ გადადგა 2018 წლის 31 მაისს. მისი განცხადებით, ამ ნაბიჯს არც დღეს ნანობს და მისი გადაწყვეტილება ზოგადად პროკურატურის და სახელმწიფოს ინტერესებიდან გამომდინარეობდა. 

ირაკლი შოთაძეს საპროკურორო საბჭოზე მოსმენისას ჰკითხეს: რატომ გადადგა 2018 წლის 31 მაისს? რამდენად აქვს საბჭოს იმის გარანტია, რომ მხარდაჭერის შემთხვევაში 6 წლის განმავლობაში შეასრულებს გენერალური პროკურორის ფუნქციას და მსგავსი კრიტიკული სიტუაცის შემთხვევაში არ გადადგება.  

საქმე ეხება ხორავას ქუჩაზე მომხდარი მკვლელობის გამოძიებას. „ეს რა თქმა უნდა იყო ჩემი გადაწყვეტილება და გამომდინარეობდა ზოგადად პროკურატურის, სახელმწიფოს ინტერესებიდან. მაშინ შეიქმნა განსაკუთრებული სიტუაცია, როდესაც მართლაც მძიმე სისხლის სამართლის საქმეზე კომუნიკაციის პრობლემა შეიქმნა საზოგადოებასთან. ვინაიდან სისხლის სამართლის საქმეები და მათზე მიმდინარე გამოძიება არის აქტუალური საზოგადობისთვის, პოლიტიკური პარტიები ცდილობენ ამ საქმეების პირადი ინტერესებისთვის გამოყენებას. ამ პერიოდში შექმნილი სიტუაცია და საზოგადოებაში არსებული გაუგებრობა მეტწილად გამოწვეული იყო პოლიტიკური პარტიების მიერ ამ ტრაგედიით მანიპულირებით. საზოგადოება შეცდომაში იყო შეყვანილი, ვინაიდან რეალურად იყო მიღებული მხოლოდ პირველი ინსტანციის გადაწყვეტილება და გრძელდებოდა პროცესი და ყველაფერი წინ იყო. საგამოძიებო ორგანოებს, შსს-ს და ასევე პროკურატურას, როგორც ბრალდების მხარეს დიდი სამუშაო ჰქონდა გასაწევი, რომ ამ საქმეზე მართლმსაჯულება აღსრულებულიყო“, - განაცხადა შოთაძემ. 

მისივე თქმით, სურდა საზოგადოებას დაენახა, რომ მისთვის გენერალური პროკურორის თანამდებობა არაფერს წარმოადგენდა. „მთავარი გზავნილი საზოგადოების წინაშე ამ შემთხვევაში იყო ის, რომ დაენახათ, რომ ჩემთვის ეს თანამდებობა არაფერს წარმოადგენდა. ეს იყო შესაძლებლობა საზოგადოების, კანონის სამსახურში ვყოფილიყავი და აღგვესრულებინა მართლმსაჯულება. შესაბამისად, იქ მე რამე მოტივაცია არ მქონია, რომ მართლსაწინააღმდეგო ქმედება ჩამედინა ან ჩემი სამსახურეობრივი უფლებამოსილება კანონის საწინააღმდეგო მიზნებისთვის გამომეყენებინა. ასევე ამ გადაწყვეტილების მიზეზი იყო ის, რომ ეს პროცესი წასულიყო სამართლებრივი გზით და საქმე ლოგიკურ დასასრულამდე მისულიყო“, - განაცხადა შოთაძემ.  

საპროკურორო საბჭო დღეს საქართველოს გენერალური პროკურორობის კანდიდატ ირაკლი შოთაძეს უსმენს.

ირაკლი შოთაძე საქართველოს მთავარი პროკურორის თანამდებობას 2015 წლის 27 ნოემბრიდან იკავებდა. შოთაძემ მთავარი პროკურორის თანამდებობა 2018 წლის 31 მაისს დატოვა. მან პროკურატურაში მუშაობა 2006 წლის მარტიდან დაიწყო და 2010 წლის სექტემბრამდე სხვადასხვა თანამდებობას იკავებდა.

საქართველოს გენერალური პროკურორის თანამდებობა ვაკანტური მას შემდეგ გახდა, რაც პარლამენტმა შალვა თადუმაძე საქართველოს უზენაესი სასამართლოს მოსამართლედ აირჩია.