კონკრეტულ კონგრესმენებს შეიძლება ჰქონდეთ პრეტენზიები, თუმცა სახელმწიფო დეპარტამენტის ანგარიშებში ისეთი ქვეყნების მიმართ არსებობს პრეტენზიები, შესაძლოა იფიქრო, ურთიერთობის გაფუჭებაზეა საუბარი, - ამის შესახებ პარლამენტის ვიცესპიკერმა გიორგი ვოლსკიმ „ქრონიკის“ ეთერში განაცხადა. 

მან კონგრესმენების წერილის შესაძლო უარყოფით შედეგებთან დაკავშირებით დასმულ შეკითხვას უპასუხა. გიორგი ვოლსკის განცხადებით, საქართველო, რომელიც უსაფრთხოებით დამოკიდებულია შეერთებულ შტატებზე, პარტნიორული ურთიერთობის გარეშე ვერ განვითარდება, რაც თავის მხრივ, არ ნიშნავს იმას, რომ „რაღაც დაგვითმეს, მოგვეფერნენ და ეს თავად აშშ-საც კარგად ესმის“. 

„ამას არ უნდა დაემუქროს დროებითი გაუგებრობა, რაც წარმოშვა ამ წერილების შინაარსმა“, - აღნიშნა ვოლსკიმ. მისივე თქმით, თუ ქვეყანა ყველაფრის უზურპაციას მოახდენს და დემოკრატიულ ღირებულებებს გათელავს, რა თქმა უნდა, ამაზე არამხოლოდ სტრატეგიულ პარტნიორს ექნება რეაქცია, მაგრამ ეს არ არის რეალობა და აქედან გამომდინარე, აშშ მთავარი პარტნიორის მიმართ არანაირ გაუგებრობას არ დაუშვებს.

„ჩვენი ოპონენტები ამაზე თავისი ინტერესებიდან გამომდინარე საუბრობენ“, - განაცხადა პარლამენტის ვიცესპიკერმა. 

პოლიტიკოსი ეჭვობს, უნდათ თუ არა ოპონენტებს არჩევნების ჩატარება, რადგან პროპორციულის მთავარი წინაპირობა სწორედ ჯანსაღი ოპონირებაა, რაც მათ მიზნებს ეწინააღმდეგება.